O acto contará coa participación de Iago Martínez e Dorés Tembrás e desenvolverase a partir das 20 h. na Casa da Fariña, no número 6 da praza coruñesa do mesmo nome (tamén de Azcárraga). Publica Toxosoutos.

Cúmprese un decenio desde o pasamento da autora de Denuncia do equilibrio e outros títulos destacados da produción poética galega entre mediados dos anos 80 e o propio ano 2003, cando apareceu Intempériome. Manuel Bragado escribe en Faro de Vigo e reproduce no blog Brétemas unha nota emocionada sobre o seu recordo e actualidade. A Comisión de Igualdade do Consello da Cultura Galega está a organizar unha xornada centrada no estudo da súa obra e personalidade. Terá lugar na primavera de 2014 e estará dedicada así mesmo a outra poeta da que axiña se conmemorará tamén o décimo aniversación da súa desaparición, Luísa Villalta (1957-2004).

O martes 29 de outubro, no pub compostelán Modus Vivendi, reiníciase a actividade dos Picaversos, nesta ocasión baixo a invocación de Bartleby, o personaxe de Melville. Participarán no recital, a partir das 21 h., Luci Romero, Rocío González Lorenzo e Alfonso Pexegueiro.