Coordinado por Burghard Baltrusch o libro Lupe Gómez: azul e estranxeira. Estudos e traducións sae baixo o selo da editora berlinesa Frank & Timme. Compila unha serie de estudos sobre a poeta e suma a isto a tradución de Pornografía a inglés e francés e a de Os teus dedos na miña braga con regra a portugués e alemán.

A musicóloga suíza Dorothé Schubarth e o filólogo galego Antón Santamarina publicaron a partir de 1984, en sete volumes, unha compilación de máis de cinco mil pezas clasificadas nos apartados de Oficios e Labores, Festas Anuais, Romances Tradicionais, Romances Novos, Cantos Narrativos, Sucesos, Coplas Locais, Cantos Dialogados, Coplas Diversas e Cantos Enumerativos e Estróficos. A Fundación Barrié pon agora a disposición pública a través da súa páxina web o conxunto da publicación.

A programación esténdese do mércores 24 ao sábado 27 de abril, con pasarrúas, lecturas e intervencións en diversos espazos urbanos: Ateneo, Mercado da Magdalena, Canido, Ferrol Vello, Esteiro, Praza de Armas e distintos locais públicos.