Segundo a presentación editorial desta Poesía completa, ata que sae este libro, de Valentín Paz Andrade salientábanse sempre outras facetas intelectuais, mentres que a poesía parecía algo secundario no seu labor. Non obstante, logo da difusión por Xerais, a carón da obra coñecida, de sete libros inéditos, dous poemarios fragmentarios e outros poemas soltos cómpre reconsiderar esta idea tan espallada.

Editada polo profesor Gregorio Ferreiro, esta obra supón difundir libros de poemas descoñecidos que demostran que o seu autor non parou de escribir entre a Guerra Civil e os anos 80. Desa poesía citaremos agora tres das obras escritas durante a Guerra Civil: A serra. Cantos do desterro branco, Sangue na neve: Etopeia da serra e mais Cantos da aguia e do lobo, datadas todas no ano 37. O responsable da edición afirma que ao ler estas páxinas as lectoras e lectores poderán seguir por estes versos todo o periplo do século vinte que vai entre o ano 37 e o 84, un percorrido sobre as linguaxes e tendencias poéticas deses anos, coa importancia que iso ten no estudo non só da obra do autor, senón da propia literatura de noso na Guerra, o Franquismo e a Transición.