Co obxectivo de ampliar e diversificar os materiais ofrecidos en poesiagalega.org, o equipo do proxecto emprende a tarefa de incorporar ao seu repositorio as antoloxías publicadas das sucesivas edicións do Festival da Poesia no Condado.

Este festival constitúe un importante referente en eventos do seu perfil no campo literario galego, e caracterizouse desde os seus inicios pola procura dunha converxencia efectiva entre poesía, pensamento crítico e transformación social. A través destes volumes accederemos á produción dos poetas participantes en cada convocatoria, procedentes na súa maior parte de Galiza mais cunha presenza tamén importante de poetas doutros países da lusofonía, o País Vasco ou Cataluña. Ademais, a incorporación de outros materiais artísticos (fotografías, deseños, viñetas) aumenta o valor da publicación en moitas das entregas.

Neste traballo de recuperación e dixitalización foi imprescindíbel a colaboración da entidade organizadora do festival, a Sociedade Cultural e Desportiva do Condado, a quen poesiagalega.org quere manifestar publicamente o seu agradecemento.