Recensión de Hordas de escritura na que se encadra o libro na "pentaloxía" Método. Saliéntase a indagación sobre o feito poético e as mudanzas que este experimenta. Repárase no proceso de desdobramento e no diálogo establecido cos personaxes, coa propia escritura, co lector ou lectora e coa lingua, a literatura e a arte, advertindo sobre a menor intensidade da presenza de obras literarias alleas. Chámase ademais a atención sobre a proximidade á crónica, e tamén sobre o retorno, na segunda parte do volume, a escenarios que resultan familiares. O rexurdimento do compromiso social e a reivindicación da faciana animal do ser humano son tamén obxecto de comentario. A recensión conclúe coa consideración do libro como unha reflexión sobre a escritura, o mundo e a sociedade.