Recensión de As horas de María, de Paco Souto, galardoado co Premio de poesía Johán Carballeira 2006. A autora, despois de vincular a traxectoria de Souto coa denominada "poesía dos 90" e con proxectos editoriais xurdidos nesa década como Edicións do Dragón e Letras de Cal, reconstrúe a poética do libro. Esta asenta na composición dunha escrita atravesada pola memoria comunal e o confronto co decorrer da historia. De tal forma que constitúe un imaxinario da perda que admite a lectura de clase. En relación con este aspecto, Ana Salgado relaciona o poemario de Souto con propostas como as de Anxo Angueira, Olga Novo, María Mariño ou Chus Pato.