A seguidilla de século XVII El amor del soldado/ no es más de una hora/ que en tocando la caja/adiós, señora, parece que tivo unha grande difusión naquela época, pois pódese encontrar no Vocabulario de refranes y frases sentenciosas (1627) de Gonzalo Correas, así como en tres pezas teatrais: unha anónima, outra de Claramonte e en El alcalde de Zalamea de Calderon de la Barca. Esta composición foi recollida na tradición oral moderna italiana, española e hispanoamericana, e en Galiza esta seguidilla converteuse nun refrán en que tamén se pode ver como o amor do soldado pasou para o amor do estudante ou para o amor do forasteiro, ou sexa, continúa a advertirse sobre a inconveniencia de namorar con xente de paso ou estranxeira.