Semblanza de Luís Seoane e achegamento á súa obra no caderniño editado por Filoloxía Galega, da Universitat de Barcelona, co gallo do Día das Letras Galegas. Losada valora como crítico e como amigo ao artista ético e marcado pola historicidade, comprometido cun tempo, con Galicia e co seu pobo. Valórase a súa obra poética en paralelo á pictórica: a cor que reborda a liña do debuxo ten un correlato na escrita, na que a paixón vai alén das convencións formais do poema; o mural mantén o alento épico que caracteriza os seus versos; e o desexo que lle manifestou Seoane de pintar grandes espazos públicos cadra coa súa escrita pensada tamén para comunicar cun público amplo. Destácase o seu compromiso coa emigración galega, que o levou a unha polémica con Celso Emilio Ferreiro.