Recensión sobre dous libros do poeta lugués asentado en Francia, Cesáreo Carballido, sede auga (2000) e pequeno sol satélite (2001). Xaime Varela, que foi profesor de galego en París, abre o artigo facendo un reconto dos escritores galegos que escribiron ou publicaron en Francia ao longo do século XX, entre os que aparece un número importante de escritores comunistas.

Complétase a panorámica da cultura galega en Francia cunha listaxe da prensa periódica galega publicada alí. A seguir ofrécese unha breve ficha biobibliográfica de Cesáreo Carballido e mais un achegamento á súa obra poética. Ponse en relación o concepto de verdade do filósofo Alain Badiou coa súa concepción da creación. As continuas referencias metapoéticas evidencian que se deposita na linguaxe e na parodia unha esperanza liberadora e que o poema se ofrece como espazo de resistencia fronte ao pensamento dominante e as formas de imposición da sociedade burguesa e o mercado.

O artigo remata cun poema inédito breve cedido para esta publicación.