Semblanza de Lois Pereiro escrita por Suso de Toro e publicada no monográfico que a revista Luzes de Galiza lle dedicou logo da súa morte. O texto acompáñase cun retrato urbano e nocturno de Lois Pereiro feito por Xurxo S. Lobato que resume a súa poética. A partir da constatación da chuvia que marcou o día do seu enterramento no Incio, e cunha referencia ao verso “Chove para que eu soñe” de Uxío Novoneyra, transformado en “chove para que eu comprenda”, ofrécese o retrato do poeta como un príncipe fatalmente inocente, chamado a bater nos atrancos da vida pero dotado da claridade. Dáselle explicación así á morte temperá do creador.