Hai características da linguaxe poética tales como a alta dose de recorrencia ou a maior pervivencia na memoria que fan que a poesía teña unha capacidade especial para instaurar valores no imaxinario social. A esta luz analízase Cantares gallegos, pedra fundacional do Rexurdimento galego, como obra que inaugura un modo novo de percibir a paisaxe galega, convertida a partir de entón nunha das condicións simbólicas da nación. A reivindicación paisaxística maniféstase como finalidade fundamental da obra dende o prólogo e subxace en escollas estilísticas, enunciativas e estruturais.