Hai varios romances da tradición oral moderna que teñen como protagonistas padres e frades de aventuras picarescas, sempre cun tratamento burlesco e anticlerical. O máis popular de todos é O padre pide chocolate, tamén coñecido como O cura e a criada. Na tradición de Galiza a lingua autóctona ten unha notábel presenza neste romance, sobre todo no inicio, debida á asociación da lingua galega cos asuntos xocosos ou burlescos.