Libro sobre un personaxe rescatado do esquecemento: o médico Emiliano Balás Silva (1859-1934), correspondente da Real Academia Galega, poeta e autor dramático en galego, que tamén se dedicaba á pintura (como pode comprobarse nas ilustracións deste libro). Activista cultural a prol do galeguismo, involucrado na fundación da Irmandade da Fala en Ferrol (30-04-1917) e na creación de Toxos e Froles. Os seus poemas, como o famoso “T’envexo” andan espallados por revistas. Juan José Burgoa publica na Colección Soláster da Sociedade Cultural Valle Inclán de Ferrol, presidida pola poeta Julia Uceda, este libro destinado a poñer de relevo unha figura das moitas esquecidas por unha comunidade, a ferrolá, que segundo o autor desta recensión, prefire homenaxear persoeiros alleos a ela. Porque, segue a dicir Araguas, citando un famoso poema, “Ferrol fai aos seus homes, para desfacelos logo”.