Defensa dunha lectura libre non intermediada por paratextos nin poéticas de autor. Defensa así mesmo dunha lingua libre e non normativizada cando se trata da creación literaria. Novoneyra xulga homoxeneizadoras e encorsetadas as propostas ortográficas do Instituto da Lingua Galega e as propostas que se lle opoñen desde o reintegracionismo. Critica igualmente as xenreiras e marxinacións traídas pola que denomina teimosía normativizadora duns e doutros. A guerra ortográfica, segundo o autor, restou color, sabor e aventura á literatura galega última. O texto preludia unha composición titulada "Viaxe", que dialoga cunha carpeta de grabados de Carlos Crego. O poema incorporaríao con lixeiras modificacións en 1994 ao volume Poemas da doada certeza i Este brillo premido entre as pálpebras.