O monográfico dedicado a Xosé María Álvarez Blázquez, homenaxeado nas Letras Galegas do 2008, inclúe textos de diferente perfil. Tras unha introdución con algúns apuntamentos sobre a súa figura, titulada "XMAB. Unha sombra polas eiras", ofrécense distintos artigos escritos ora desde a proximidade vital ora desde a proximidade crítica, que se ocupan de informar sobre a súa biografía e actividade editorial, epistolar, xornalística e literaria. As achegas van asinadas por Darío Xohán Cabana, Miro Villar, Manolo Bragado, María Dolores Cabrera, Xavier Rodríguez Baixeras, Manuel Forcadela, Carlos Callón, Celso Álvarez Cáccamo e Xosé María Álvarez Cáccamo. Este último artigo pecha a publicación informando das actividades e produción aparecida en torno ao autor homenaxeado, cunha listaxe de nomes do ámbito cultural que sobre a súa obra e figura se pronunciaron. Alén das fotografías do autor, o deseño do monográfico inclúe debuxos de Berta Cáccamo encabezando a maioría dos textos.

O equipo de poesiagalega.org deixa constancia do seu agradecemento ao Grupo Correo Gallego e en particular a Caetano Díaz, director de Galicia Hoxe, por facilitaren a reprodución deste e doutros números de "Revista das Letras". O agradecemento diríxese tamén a Antón R. López e Montse Dopico, coordinadores do suplemento, e faise extensivo aos xornalistas, técnicos e colaboradores do mesmo.