Tras afirmar que está por estudar a influencia de Rosalía de Castro nas letras portuguesas durante os últimos cen anos, analízase a presenza da escritora de 1910 a 1930.

Durante ese período, o primeiro que estivo atento á figura "rola de Galicia" foi o profesor José Cervaens. Anos despois, Cláudio Basto e Carolina Michaëlis, ao interesarse pola saudade, exemplificaron coa obra de Rosalía. O seguinte autor que se ocupou de Galicia e da poeta foi Teixeira de Pascoaes, cuxo papel como socio do Instituto Histórico do Minho será importantísimo para alimentar a devoción por Rosalía e a súa terra. Así o mostra a presenza das letras galegas na publicación A Aurora do Lima e mais na velada literaria de homenaxe á autora celebrada en xullo de 1924.