O romance da Adúltera (ó), tamén coñecido por Albaniña, é o máis popular dos romances de adulterio. O tema pode encontrarse en todo o folclore universal, sexa en prosa ou en verso. O romance hispánico acaba sempre de maneira tráxica, castigando ou facendo morrer a muller adúltera, mentres noutras tradicións o tratamento do tema é xocoso e céntrase nas burlas ao marido enganado. 

Este romance xa foi recollido nos cancioneiros do século XVI e nel inspiráronse os dramaturgos do teatro clásico español. Na actualidade é un dos temas máis difundidos na tradición oral panibérica e nalguns países entrou a facer parte do repertorio infantil malia o seu asunto non semellar apropiado para os máis novos.