Despois de aludir á escaseza de traballos de orde lingüística sobre a obra de Rosalía de Castro, Xosé Luís Pensado céntrase no Glosario dos Cantares gallegos, elaborado por Manuel Murguía e pensado pola poeta para alcanzar un auditorio castelán. O investigador considera conveniente comparar o léxico completo de Rosalía co contido do Glosario.

A análise permítelle a Pensado percibir as influencias do dicionario de Francisco Javier Rodríguez nalgunhas definicións do Glosario, profundar en palabras que non aparecen no segundo e ofrecer a súa procedencia e significado, matizar expresións que non teñen o sentido adecuado, ademais de engadir comentarios e comparar coa definición ofrecida noutros dicionarios.