Aproximación á poesía galega de José Ángel Valente que comeza cunha panorámica biobibliográfica e información sobre a recepción crítica do escritor. O estudo céntrase na relación do poeta con Galicia e, en particular, no libro Sete Cántigas de Alén (1981), do que se leva a cabo unha análise que se ocupa do conflito entre intelecto e sentimento no relativo ao paso do tempo, considerado o eixe temático da obra. O autor do artigo aborda esta como un exemplo de poesía de meditación, ao tempo que a encadra na tradición rupturista e repara na importancia das citas de Afonso X O Sabio (cantiga CIII) e de Manuel Antonio.