Alúdese á veneración dos escritores galegos por Rosalía de Castro e concrétase en Manuel Curros Enríquez, cuxa inclinación se manifestou na lírica e no xornalismo. Para Aurora Marco, tamén na obra de Curros é notoria a influencia da faceta costumista e folclórica de Rosalía. Estes dous aspectos son analizados no artigo, concretamente as referencias expresas de Rosalía en Curros e as influencias literarias da primeira no segundo.

Por unha banda, procédese á catalogación das referencias rosalianas no poeta de Celanova e que, maioritariamente, se atopan nos seus versos. Trátase de elementos que permiten caracterizar a poesía de Rosalía e analizar a súa recepción.

En canto ás influencias directas de Rosalía de Castro sobre Manuel Curros, estas encóntranse na corrente costumista de Cantares gallegos. "Unha boda en Einibó" e "O gueiteiro" serían exercicios poéticos á maneira rosaliana.