Chámase a atención sobre o prólogo de Follas novas e destácase a insistencia no alleo e a súa relación co suxeito poético. A continuación, desenvólvese o concepto de dialoxismo e especifícase que o interese na medida en que se relaciona co contexto. Parte, pois, Carlos Reis de que a poesía de Rosalía de Castro está motivada polas circunstancias de comunicación explicitadas desde o primeiro texto cando, a través da comparación, o suxeito poético implica no discurso un contexto. Reis trata de configurar a entidade da relación dialóxica e considera que, a pesar  da intensidade lírica, subsiste en Rosalía a capacidade de establecer un diálogo cun ti susceptible de se representar metamorfoseado. Conclúese indicando que o dialoxismo de Follas novas se asocia ao hibridismo entre un claro modo lírico e un difuso modo narrativo, tal e como o traducen as oscilacións temáticas.