PENÉLOPE

DECLARA O ORÁCULO:

       "Que a banda do solpor e mar de mortos,
       incerta, última luz, non terás medo.

       Que ramos de loureiro erguen rapazas.
       Que cor malva se decide o acio.

       Que acades desas patrias a vindima.
       Que amaine o vento, beberás o viño.

       Que sereas sen voz a vela embaten.
       Que un sumario de xerfa polos cons".

Así falou Penélope:

       "Existe a maxia e pode ser de todos.
       ¿A que tanto nobelo e tanta historia?

       EU TAMÉN NAVEGAR."

[Poesía reunida (1957-2001). Santiago de Compostela: PEN Clube de Galicia, 2004]