Descrición sociolóxica e sentimental dun Monforte só parcialmente compartido no tempo e na vivencia xuvenil por Teresa Moure e Lois Pereiro. A autora fala da familia do poeta, en particular da nai, da irmá e da señora Amalia, e lembra algúns dos espazos que os biógrafos de Pereiro teñen destacado como escenarios habituais de encontros. Detense así mesmo en aspectos sociolingüísticos e traza un retrato colectivo da cidade e dos seus habitantes. Moure observa que nunca falou con Pereiro e tamén que serían notábeis as diferenzas canto a referencias artísticas, literarias ou noutros planos. Malia o cal destaca que hai algo no que se recoñece, algo compartido: "a alma devastada, a provocación infinda, os modos agrestes do punk".

Deseño de "Revista das Letras": Signum.

O equipo de poesiagalega.org deixa constancia do seu agradecemento ao Grupo Correo Gallego e en particular a Caetano Díaz, director de Galicia Hoxe, por facilitaren a reprodución deste e doutros números de "Revista das Letras". O agradecemento diríxese tamén a Antón R. López e Montse Dopico, coordinadores do suplemento, e faise extensivo aos xornalistas, técnicos e colaboradores do mesmo.