Recensión sobre Obra en galego completa de Álvaro Cunqueiro na que se repasan as principais obras que a integran. De Mar ao norde, considerado exemplo de “poesía pura”, destácanse as súas principais influencias (Rilke, Valéry, Eliot, Manuel Antonio). Poemas do si e non preséntase como unha obra de influxo surrealista e de gran orixinalidade. A propósito de Cantiga nova que se chama riveira saliéntase a frescura e a modernidade do neotrobadorismo cunqueiriano. Dona do corpo delgado é considerada polo autor unha obra de cambio e de madurez na que adianta algúns temas, como a preocupación polo paso do tempo, desenvolvidos no seu derradeiro libro Herba aquí e acolá, que ofrece o froito da súa experiencia persoal.