Monográfico sobre o roteiro literario-artístico dedicado a Fiz Vergara Vilariño (1952-1997) no val da Lóuzara, a súa terra natal. Este proxecto foi inaugurado o 18 de marzo de 2010 e está impulsado pola asociación cultural Ergueitos, de Sarria; nel, trece creadores galegos (Eduardo Valiñas, Paco Pestana, Otero-Yglesias, Mónica Alonso, Violeta Bernardo, Buciños, Álvaro de la Vega, Manuel Caamaño, Caxigueiro, Fernando Yáñez, Miguel A. Macías, Paco Poy e Primitivo Lareu) interpretan plasticamente un poema do autor ligado a un punto xeográfico concreto co obxectivo de que a palabra poética "asalte" os camiñantes dos roteiros.

O equipo de poesiagalega.org deixa constancia do seu agradecemento ao Grupo Correo Gallego e en particular a Caetano Díaz, director de Galicia Hoxe, por facilitaren a reprodución deste e doutros números de "Revista das Letras". O agradecemento diríxese tamén a Antón R. López e Montse Dopico, coordinadores do suplemento, e faise extensivo aos xornalistas, técnicos e colaboradores do mesmo.