Recensión do libro Ortigas, de Xiana Arias Rego, XIX Premio Nacional de Poesía Xosemaría Pérez Parallé. Divídese en sete apartados, mais hai unha medula que percorre todo o espiñazo do libro, a presenza das “lauras”, unha sorte de sinécdoque das mulleres como vítimas da violencia machista. Outras simbolizan a condición de mulleres condenadas á ablación, á prostitución ou á violación, con versos duros. No eido formal a poeta cultiva breves poemas en prosa, aínda que a narratividade está sempre presente até nas composición máis líricas, adoito en estruturas dialóxicas e continuas obxectualizacións do cotián. Dialéctica, narratividade, tensión dramática e teima por fuxir do convencionalismo caracterizan unha lectura para a reflexión.